Астрологијата ја негира слободната волја.
 

Ова е уште една од предрасудите што за Астрологијата ги имаат оние кои не ја познаваат. Бидејќи, не само што Астрологијата не ја негира слободната волја, туку напротив му помага на човекот да ги осознае најдлабоките мотиви за своите реакции, да ги освести, контролира и управува со нив. Од друга страна, имајќи увид за различните вселенски, планетарни и земјини циклуси, Астрологијата може да ни помогне да го избереме вистинското време за секоја работа. Таа ни открива кога е време за акција, кога е време за мирувања. А тоа поинтуитивните луѓе и самите го чувствуваат без да имаат сознанија од Астрологијата. Единствениот грев на Астрологијата е фактот што таа ни помага да откриеме кои сме, какви се нашите потреби, од каде доаѓаме, каде одиме и каде би можеле да отидеме ако ги смениме негативните обрасци во нашиот карактер.

За волја на вистината, убедувањето дека Астрологијата има фаталистички пристап веројатно е создадено во периодот кога психологијата била во повој, кога не се знаело за влијанието на несвесниот ум врз реакциите на човекот. Бидејќи ако прифатиме дека карактерот ја креира судбината, тогаш колку човекот е понесвесен за причинско-последичната врска на своите постапки, колку повеќе е “роб на нагоните”, толку помалку може да раководи со својот живот. Тогаш е препуштен на силите на судбината кои всушност тој ги покренал во движење со своите постапки во минатото. Но, може тоа да го стори пак и пак, онолку пати додека не сфати на кој начин ја предизвикал причината за дадената последица и додека не го смени своето неправилно однесување.

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.