Ѕвездите укажуваат, не обврзуваат
(Astra inclinant, non necessitant)
 

Значи уште старите Латини имале здрава претстава за тоа како треба да гледаме на влијанието на ѕвездите, драги мои. Но, не е ни чудно, бидејќи сите стари народи кои егзистирале пред новата ера, имале многу поголеми сознанија за функционирањето на Вселената и за Вселенските Закони од она што ние го знаеме денес. Многу од тие знаења се чувале во Александриската библиотека која е запалена од страна на Цезар (според Плутарх). Нешто од книгите е спасено, како на пример Тетрабиблос, книга за астрологијата, од Птоломеј (од династијата на Птоломеите потекнува и Клеопатра, последната македонска кралица). Но, есенцијалните сознанија се уништени, кој знае кој пат по ред, секогаш кога некој диктатор сакал да го сокрие вистинското знаење и информации од луѓето, со цел полесно да ги владее.

Дека Господ му ја оставил на човекот слободната волја и дека ѕвездите не се мешаат во тоа, потврдува уште една латинска изрека која вели:

„Ѕвездите владеат со луѓето, но Бог владее со ѕвездите“ - (Astra regunt homines, sed regit astra Deus).

Па, ако ја вклучиме логиката излегува дека штом Бог владее со ѕвездите, а ѕвездите со луѓето, тогаш Бог владее и со луѓето и со ѕвездите, нели? Затоа, отпаѓаат обвинувањата од страна на црквата насочени кон астрологијата дека таа сака да се стави над Господ или дека се меша во слободниот избор. Или овие тенденции на црквата спаѓаат во графата „полесно владеење со другите“?

За волја на вистината имаме и една изрека која вели:

„Ѕвездите не лажат, но астролозите лажат за ѕвездите“ - (Astra non mentiuntur, sed astrologi benе mentiuntur de astris)

Со други зборови кажано: Астролозите погрешно ги толкуваат. Но, што е тука чудно? Истото се случува во секоја бранша. Секој ги бере плодовите само до онаа височина до која тој пораснал. Постојат и неморални лекари кои ги лажат своите пациенти и лажно ја претставуваат нивната наука. Лажат и банкарите, трговците, уште повеќе политичарите. Колку повеќе се неспособни и колку помалку ја познаваат областа во која работат, толку повеќе лажат. Но, да не заборавиме, најмногу се лаже ако од тоа лажгото завиткан во обландата на професијата има финансиска корист. Ооооо, тогаш се лаже на ангро.

Тоа значи дека не можеме да судиме за вредноста на науката според луѓето кои ја практикуваат, бидејќи човекот е најрасиплива „роба“ и лесно се корумпира поради моќ, власт, пари. Затоа, за „дрвото ќе судиме според плодот што го дава“, како што не учеше Христос. Па, за стручноста на еден човек во некоја област ќе судиме според резултатите од неговата работа.

Како јаготка врз шлагот, за крајот го чувам она што Тесла го има кажано за луѓето и за влијанието на силите од Универзумот врз нив. Тој вели:

„Секое живо суштество е мотор придвижуван од тркалото на Универзумот. Иако изгледа дека врз него има влијание само неговото непосредно опкружување, сферата на надворешно влијание се протега до бесконечна далечина“... Уааау... То мајстореее...

И како полн погодок во контото на потврдата за влијанието на ѕвездите врз луѓето, Тесла додава:

„Еден зрак светлина од далечна ѕвезда што паѓа врз окото на тиранин во минатите времиња можеби го променил текот на неговиот живот, можеби ја променил судбината на нациите, можеби ја трансформирал површината на земјината топка, ете толку незамисливо сложени се процесите во Природата.“

П.С. Текстов го напишав со цел да им објаснам на оние меѓу вас кои сметаат дека ѕвездите ќе им ги одработат лекциите во животот што треба тие сами да ги работат. Во заблуда се. Бидејќи, ѕвездите (планетите) се само како мајстори кои ја местат сцената за претставата. А, ние сме глумците кои треба да ја одиграат. Од нас зависи дали ќе ги употребиме сите реквизити на сцената правилно, како ќе ги кажеме нашите реплики, како ќе соработуваме со другите актери на сцената, дали ќе импровизираме и дали ќе предизвикаме громогласен аплауз на крајот, дали ќе предизвикаме свиркање или воопшто нема да се појавиме на сцената.

Виолета С. Марсол

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.