QUO VADIS MACEDONIA?
(Во Македонија се потребни само 2 вакцини,
против лоповлук и против предавство)
 

Каде одиш Македонијо?

Со години избегнувам да ја погледнам Наталната Карта на Македонија, бидејќи знам дека би можела да видам настани кои не сум подготвена ниту да ги преџвакам, а камоли да ги голтнам. Па, бидејќи јас, како единка, не можам да ги сменам, си олеснувам со тоа што барем не ги носам со себе во својата меморија.

Меѓутоа, кога пред извесно време го пишував текстот за ретроградниот Меркур и неговите особености, помислив: „Ха, некои од читателите можеби ќе кажат дека во Македонија ситуацијата е секогаш таква, еден чекор напред-два чекори назад, а не само кога Меркур е ретрограден.“ Тогаш ми падна на памет дека веројатно Меркур навистина е ретрограден во Наталната Карта на Македонија и решив да проверам. Сакала или не, тогаш добив увид и во настаните кои ќе се одвиваат во блиска иднина и тоа не ми дава мир. Од една страна, не би сакала да влијаам врз создавањето страв и негативен егрегор меѓу народот. Но, од друга страна, знам дека информиран човек е наполу спасен човек. Тоа преовлада со мојата одлука да зборувам на оваа тема.

Што покажуваат планетите за иднината на Македонија?

Аспектите во Наталната Карта на Македонија се доста нехармонични и неповолни, што само по себе покажува дека повеќе време ќе трошиме во борбата за нејзин опстанок отколку на развојот. Ако на тоа се надоврзе и транзитот на некој малифик, тоа доведува до ситуација падни-стани, која често ќе се повторува. Да не одиме подалеку, ќе зборувам за блиското минато. На пример, во периодот од јануари 2013 до февруари 2019, кога Плутон, планетата на подземјето, уништувањата, смртта и трансформацијата, во транзит, започна да прави нехармонични односи со Уран, Нептун и СМЈ (сите до еден ретроградни во Наталната Карта на Македонија) и тоа токму во полето на законот, судството, дипломатијата, односот со странските држави и црквата (деветто), резултатот беше следен:

Имавме проблеми речиси со сите наши соседи по различни основи, проблеми со признавањето на Македонската Православна Црква. Потоа, се случи „Диво насеље“ во Куманово во 2015, бегство на бившиот премиер во Унгарија во ноември 2018, судење на шефицата на Специјалното Јавно Обвинителство, итн. И покрај пресудата на судот во Хаг, од 5 декември 2011, во корист на Македонија во спорот со Грција, другата страна не ја испочитува пресудата, имавме промена на името на државата на 17 јуни 2018 со преспанскиот договор. Значи, не е случајно што сите мачни настани во Македонија, во периодот од јануари 2013 до февруари 2019, беа поврзани со законот, странство, судовите, црквата. Така ни било запишано таму, горе.

А сега замислете чудо! Преспанскиот договор беше потпишан на 17 јуни 2018, токму тогаш кога на Плутон во деструктивната игра поврзана со законот, судството, односот со странските држави и црквата, во Наталната Карта на Македонија, му се придружи уште еден лош дечко, Сатурн, планетата на злото (физичко, морално и материјално) и реализатор на кармата, во периодот од јануари 2018 до јануари 2020. Хммм... двојна неволја.

Со тоа што Плутон од февруари 2019 го напушти полето на законот, судовите, односот со странските држави и црквата, се сменија и околностите. Така, оваа година, 2022, Македонската Православна Црква - Охридска Архиепископија ја доби својата автокефалност. Премногу е за да биде плод на коинциденција, нели? Уште повеќе што оној кој верува во случајности не верува во Бога.

Меѓутоа, Плутон и Сатурн продолжија и понатаму да се движат. Па, од февруари 2019 Плутон се движи низ полето на угледот, честа, владата и владетелот на државата во Наталната Карта на Македонија (Плутон во десетто). Каква фасцинантна усогласеност на настаните на небото со оние во нашата земја!? И што се случува во такви моменти? Настаните во Македонија ќе ни покажат. Така на пример, иако се потпиша на 17 јуни 2018, преспанскиот договор, всушност стапи во сила токму на 12 февруари 2019?!?! Во исто време кога Плутон го започна својот транзит токму низ полето на угледот на државата. Неверојатно, нели?

Во завереничкиот танц на смртта меѓу Вселенските Хитлер (Плутон) и Сталин (Сатурн), Плутон уште еднаш ја имаше сесрдната поддршка од Сатурн, во периодот од јануари 2020 до февруари 2022, со акцент на април, мај, јуни 2020 и јануари 2021 (транзитен Сатурн коњукција натален Сатурн во десетто поле). Тогаш, минувајќи низ полето на честа и угледот на државата, креиран од лицата што ја раководат истата (влада, претседател, премиер, елити), овој деструктивен комплот Сатурн-Плутон почна да им го разорува рационалното расудување на нејзините репрезенти и тие, свесно или несвесно, спроведуваа активности кои го разградуваа она што како-така, беше градено изминатите триесеттина години. Да не спомнувам што сѐ се случуваше во периодот од јануари 2020 до февруари 2022, кога тандемот Сатурн-Плутон беше на врвот на својата моќ: ковид криза, многу мртви и болни, проблем со набавката на вакцини (иако во Македонија се потребни само 2 вакцини: против лоповлук и против предавство), пожарот во болницата во Тетово, разговорите на комисијата за историски прашања со Бугарија (Плутон во Јарец), срам за државата предизвикан од недоветното однесување на нејзините дипломати во странство, итн.

На што треба да обрнеме внимание во иднина?

Добра вест е таа дека од февруари 2022, Сатурн го напушти полето на угледот, владата и владетелот на државата (десетто). Лоша вест е што таму останува Плутон и тоа ќе трае до 20 март 2033. Да, да добро прочитавте, до 20 март 2033 година. Со тоа што ситуацијата ќе биде најсложена во периодот од 14 февруари до 22 декември 2024, кога Плутон ќе се движи напред-назад над точката (07°45’ Водолија) каде се наоѓаше Сатурн во моментот кога е прогласена независноста на Македонија...Тан-тан-тааааан...

Што значи тоа?

Таа ситуација на небото ќе биде слична како онаа кога почна светската ковид криза, само што ќе биде фокусирана на план влада на Македонија, претседател, премиер, елити, углед и чест (транзитен Плутон 0° натален Сатурн во десетто поле на Наталната Карта на Македонија). Во најмала рака, оваа средба меѓу Сатурн и Плутон, би можела да предизвика опасност од неразрешливи проблеми во државата, криза во владата, распаѓање на истата и нејзина присилна трансформација, постапки на елитите поради кои државата ќе го изгуби угледот и националната гордост, опасности по значајните фигури во државата (болест, смрт) кои би можеле да предизвикаат нестабилност и внатрешни немири. А, кој би бил најмногу засегнат од неповолните случувања ќе покаже Наталната Карта на дотичната личност. И сето ова ќе го забибери Уран, планетата на шоковите и непредвидливите настани, кој во периодот од 4 јули 2020 до 24 мај 2028 ќе транзитира низ полето на народот, општата состојба на секое поле во државата, јавното здравје, со што би можел да предизвика непредвидливи реакции на народот кои не ќе можат да се контролираат ниту канализираат.

Како да ги свртиме планетарните вибрации во наша корист?

Ако не можеш да го победиш, тогаш придружи му се. Ова е стара изрека која не упатува каков би требало да биде нашиот однос кон посилниот противник. А, планетите ем се посилни од нас, ем нивното движење не зависи од нас ниту можеме да ја смениме нивната однапред зададена траекторија.

Што можеме да направиме?

Да ја искористиме природата на нивните вибрации како ветер во грбот во остварувањето на нашите цели. Тоа значи:

1. Пожелно е да се вратиме на своите корени, бидејќи така ќе ја зацврстиме својата индивидуалност, ќе стекнеме самосвест, бидејќи ќе знаеме дека оној што владее со минатото, владее и со иднината.
    
2. Повеќе внимание да му обрнуваме на семејството, бидејќи е тоа основна клетка на секоја држава и да ги обновиме социјалните контакти, бидејќи шанса за опстанок имаат само цивилизациите кои имаат култ кон семејството и се обновуваат самите себеси.
    
3. Во интеграцијата со другите мора да го задржиме сопствениот идентитет и самостојност. Зошто?
   Ако го споредиме ова правило со законите во биологијата, тогаш секој човек е клетка од едно ткиво (држава), а ткивата го градат целиот организам (сојузи од држави, свет). За ткивото да биде здраво и функционално, секоја клетка работи за себе, но работи и за клетките околу себе. Ако се одметне и почне да живее по свои правила, станува клетка на ракот. Ако пак има премногу порозни клеточни ѕидови, тогаш целата храна ќе ја препушта на клетките околу себе, всушност ќе се дезинтегрира и претопи во средината. Истото правило важи и за функционирањето на државите и општествата.
    
4. Да бидеме постојано свесни дека секоја држава работи само за сопствените интереси и да најдеме НЗС меѓу нашите и интересите на другите. Но, никако „не“ на наша штета. Секоја работа која не е во рамнотежа, ризикува да се уништи со текот на времето.
    
5. Да сфатиме дека еден човек (влада) не е во состојба да одлучува за цел народ. Па, со цел државата да биде успешна и функционална, за најважните прашања поврзани со нејзиниот опстанок, владата треба да ја послуша волјата на народот. И тука повторно можеме да направиме споредба меѓу клетката (влада) и организмот (народ).
    
6. Да ја контролираме роботизацијата, бидејќи машините треба да бидат наш слуга, не господар.
    
7. И конечно, секој од нас да се труди да стане подобар човек. Бидејќи, секој сака да живее со добар човек. А добриот човек, и покрај сите перипетии на кои ќе наиде во текот на својот живот, на крајот е успешен.

Виолета С. Марсол

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.