Вашиот маж е вашето огледало
 

Во животот не постојат случајности, драги мои. Затоа, секој маж (тука може да додадеме и секој пријател, непријател, шеф, соработник и слично) кој сте го привлекле и допрва ќе го привлечете во својот живот, е токму оној маж кој совршено ви одговара.

Ако на оваа моја констатација започнете да негодувате, значи, на некаков начин, сум ја допрела вашата болна точка. Па, или и вие сте свесни за тој факт или не сакате да си го признаете или пак не ви е јасно што е тоа во вашата личност што секогаш привлекува определен тип на мажи. Како и да е, запаметете дека вашиот маж е вашето огледало кое само го одразува тоа што е во вас. Па, ако неговото однесување не ви одговара не треба да му се лутите на огледалото, треба да смените некои работи кај себеси.

Така, ако вашиот партнер е насилен тип, тоа значи дека кога сте го привлекле вие сте се чувствувале, или се уште се чувствувате, како жртва, осамени, несреќни, напуштени од сите. Но, можно е и некој во детството да ве научил дека вашата судбина е да трпите и да страдате. За да го победите проблемот ќе мора да научите самите да се борите за себеси, да му поставувате граници на партнерот кои потоа и самите ќе ги почитувате, да се слушате себеси и да инсистирате, ни помалку ни повеќе, да бидете почитувани. Вакви мажи најчесто привлекуваат жените Риби, Ваги и Ракови.

Ако во својот живот сте привлекле алкохоличар или наркоман, тогаш постојат две можности. Или сте се чувствувале како „сирота јас“, ништо не ми оди од рака, немам среќа во животот или сте џангризава жена која постојано го критикува мажот и ја убива неговата машкост. Во првиот случај, ќе ја подобрите својата ситуација со актуелниот партнер, или ќе привлечете нов што повеќе ќе ви одговара, дури откако ќе научите да ја преземате одговорноста за својот живот во свои раце. Во вториот случај, ќе мора да научите да не ја убивате и повеќе да ја истакнувате својата женственост или некој друг важен дел од вашата личност, кои сте ги потиснале поради некои причини. Овие проблеми најчесто се јавуваат кај жените Риби, Ракови и Девици.

Ако сте привлекле слаб, неспособен маж, мајкин син, тоа покажува дека сте жена која сака се да држи под контрола и само таа да одлучува. Вие сигурно секогаш знаете се подобро од другите и сакате да ги менувате луѓето според своите замисли. Дури не забележувате дека најголемиот дел од вашите проблеми произлегуваат од тоа што немате доверба во својот партнер или дури немате слух за тоа што тој ви кажува. Проблемот ќе го надминете кога ќе се опуштите, кога ќе покажувате повеќе доверба во својот партнер и ќе ја намалите контролата и над него и над вашите животи. Со вакви проблеми најчесто се соочуваат жените Овни, Лавови и Јарци.

Ако пак покрај себе имате љубоморен партнер, тоа покажува дека имате проблем со својата сексуалност. Проблемот ќе го победите откако ќе ја пренасочите својата сексуална енергија во некаква креативна работа. Ова е најчест проблем кај жените Шкорпии, Бикови и Близнаци.

Ако покрај себе имате партнер кој си го живее својот живот според сопствените желби, кој е постојано зафатен со работа, со дружење со пријателите, со безбројни патувања, обврски, со своето хоби, а од вас бара да се стрпите и ве залажува со убави зборови и визии за некоја прекрасна иднина, тоа покажува дека сте претолерантна, претерано прилагодлива личност. Со вашето однесување му испраќате порака дека сте подготвена да живеете само според неговите правила, со цел да го задржите. Во основа, ова покажува дека вие не се цените доволно себеси. Ќе започнете да привлекувате друг тип на мажи дури откако ќе научите повеќе да се цените себеси, да се ставате себеси и своите потреби на прво место, да не се прилагодувате на работи кои не ви се допаѓаат, да верувате на дела а не само на зборови, да имате свој живот, интереси и пријатели кои нема да ги делите со партнерот. Овие се најчести проблеми на жените Ваги, Риби, Водолии и Стрелци.

И така натаму, и така натаму. Постојат и други случаи, но овие се најчестите. Можеби забележавте дека жените Риби се оние кои најчесто привлекуваат проблематични партнери. Тоа е поради фактот што најлесно влегуваат во улогата на жртва. На ист начин се однесуваат и жените кои имаат Месечина во Риби, завршен печат во Риби или Месечина во близок контакт со Нептун.

Но, ајде да се вратиме на почетокот од текстот. Не заборавајте, драги мои, дека вашиот партнер е вашето огледало кое само го одразува тоа што е во вас. Па, ако неговото однесување не ви одговара не треба да му се лутите на огледалото, треба да смените некои работи кај себеси.

Виолета С. Марсол

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.