Нејзиното Височество, Госпожа Карма
 

Ни крива ни должна, таа на своја сметка се има изнаслушано различни муабети, та дека е немилосрдна, та дека е кучка, та дека сурово казнува, та дека е злопамтило... и што уште не.

Е сега, некој би рекол дека зад добар коњ прашина се крева, но јас сум забележала нешто друго. Оние кои, на некаков начин, се оштетени се крстат во нејзиниот реванш. Оние кои направиле некакво зло се преправаат дека таа не постои. Оние кои прават добро обично не размислуваат за последиците или, како што велат нашите стари: „Прави добро, не кај се. Прави лошо, надај се.“

Ајде сега да видиме „што кармата е“ и „што кармата не е“.

1. Кармата не нуди мени. Таа ви го сервира тоа што го заслужувате.

2. Кармата не наградува ниту казнува. Таа претставува праведна реакција на Универзумот на некоја наша акција во минатото.

3. Не постојат миленичиња на кармата. Што сме посеале, во овој или во некој минат живот, тоа ќе си жнееме.

4. Како луѓето се однесуваат кон нас е нивна карма. Како ние реагираме на тоа е наша.

5. Кармата порачува: Ако се фокусираме на повредата, ќе продолжиме да страдаме. Ако се фокусираме на лекцијата ќе продолжиме да растеме.

6. Нема потреба од одмазда. Потребно е само да сме стрпливи и да чекаме. Оние што не повредиле, на крајот ќе направат нешто на своја штета и, ако имаме среќа, Бог ќе ни дозволи да гледаме.

7. Кармата никогаш не ја заборава адресата.

И најважното, како што вели Ц.С. Луис, во Универзумот не постои неутрална територија. Секој квадратен сантиметар, секој дел од секундата му припаѓа на Бог или е загаден од ѓаволот.

Посакувам Бог во секој дел од секундата да биде со нас за да бидеме на безбедна територија.

Виолета С. Марсол

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.