Дали најде радост
 

Според едно староегипетско предание, драги мои, пред портите на Рајот, секоја од душите која го напуштила земниот живот морала да одговори само на две едноставни прашања:

1. Дали најде радост во твојот живот?
2. Дали твојот живот донесе радост во животот на некој друг?

Од одговорот на овие прашања зависело дали портите на Рајот ќе се отворат пред душата што чека или ќе останат вечно затворени за неа.

Значи, ниедна душа не била прашувана колку била позната, славна, богата, убава? Колку пари, куќи, коли, имот, стекнала додека била на Земјата? Еталон за мерење на суштината на земниот живот и билет за влез во Рајот била доживеаната и предизвиканата радост.

Ќе признаете дека тоа е убав начин да се вреднува нечиј живот, нели?

Е сега, да се запрашаме сите ние, дали се потрудивме да најдеме радост во животот и дали успеавме некому да донесеме радост? Мислам дека одговорот кај многумина ќе биде негативен. Па, дури и поразувачки.

Затоа, да не губиме време.

Да направиме реорганизација на нашиот систем на вредности.

Да го искористиме времето кое ни останува на Земјата за да го пронајдеме она што ја буди во нас животната радост.

Да престанеме да трупаме работи.

Бидејќи, ако имаме премногу на една страна, значи дека на другата нешто фали. Рамнотежата е еден од основните Закони во Универзумот. Затоа, постојано да се трудиме јазичињата на вагата да бидат изедначени.

Виолета С. Марсол

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.