Грејс Кели
 

Грејс Кели се роди во богато семејство. Беше исклучително убава. За кратко време успеа да заблеска на Холивудското ѕвездено небо. Го сретна “принцот на белиот коњ” и докажа дека животот е само филм, а филмот е илузија бидејќи е ограничен со простор и време. А, во времето додека се одмотуваше нејзината животна лента, таа живееше како принцеза, не страдаше од тешки болести, не дочека тешка старост. И кога нејзината убавина започна да венее, таа доживеа сообраќајна несреќа. Почина на истиот начин и на истото место, каде што го снимаше својот последен филм. Филозофите тука би рекле дека никој не умира додека од длабочината на душата не го посака тоа. А, ние овој пат ќе се обидеме да допреме до причините за таквата желба.

Грејс Кели се роди на 12-ти ноември 1929 година во Филаделфија, САД. Се роди во знак и со подзнак во таинствената и магнетски привлечна Шкорпија. А, со Месечина во меланхоличните, но уметнички надарени Риби. Од овие податоци, астрологијата би рекла дека се работи за личност со челична волја комбинирана со длабоки и меланхолични чувства.

Уште веднаш, во нејзината натална карта, се забележува доминантната позиција на магот на илузијата, Нептун, кој зад превезот на блескавоста ја криеше нејзината вистинска природа. Но, и подари и магнетска привлечност со која таа го привлекуваше и одржуваше вниманието на публиката уште од мали нозе, па дури и по смртта. За нејзиното прво појавување пред публика, главен виновник беше нејзиниот татко, Џон Брендан Кели, кого сите го викаа Џек. Тој беше син на ирски емигрант и член на “Демократската партија” на Рузвелт. Така, во интерес на својата политичка кариера, Џек Кели позираше со семејството пред камерите, со цел во својата политичка кампања да се претстави себеси како семеен човек. Луѓето пак што го познаваа тврдеа дека е тој исклучително суетен. А, тој го докажа тоа многу пати. Посебно кога одбиваше да носи очила, со цел да не го расипе имиџот, иако имаше проблеми со видот.

– Но, каков беше односот на Грејс Кели кон татка си?

Картата покажува дека се работеше за човек кој не знаеше да ги покаже вистинските чувства, па дури и потценувачки се однесуваше кон неа. Тука Нептун ја направи главната илузија. Пречувствителната душа на малата Грејс, со цел да се заштити од суровата реалност започна да гради нереална, разубавена слика за него. Па дури му беше и приврзана и се трудеше да ја заслужи неговата љубов, задоволувајќи ги неговите желби. И токму од овој момент, таа започна да гради нереална слика за сите мажи во нејзиниот живот. Започна да трага по “принцот на белиот коњ”, со цел да ја задоволи суетата на татко и. До каде одеше неговата ароганција и бесчувствителност може да се види од моментот кога Грејс Кели во 1954 година го доби Оскарот за најдобра женска улога во филмот “Провинцијалка”. На прашањето на новинарите : “Дали се радува на успехот на својата ќерка?” Џек Кели одговори: “И дозволивме да биде актерка, бидејќи не знаевме која професија да ја одбере.”

Навистина потценувачко однесување, ако се знае дека на Грејс и беа потребни само неколку години, од 1951 до 1956, да стане холивудска ѕвезда. Можеби нејзиниот успех делумно се должеше на помошта од страна на чичко и Џорџ Кели, кој работеше како драматург. Но, најголемиот дел од успехот сепак се должеше на нејзиниот талент, убавина и секако на ѕвездите. Имено, на почетокот на 1951 година Кармичкиот Јазол транзитираше низ нејзиното поле на креативноста (петто) и ја допре наталната Месечина, симболот на популарноста. А, влијателниот Плутон транзитираше низ нејзиното поле на угледот и кариерата (десетто). Додека кон средината на истата година, Јупитер, планетата на среќата, минуваше низ нејзиното поле на работата (шесто). Во 1954 година, кога Грејс Кели го доби Оскарот, преку нејзиниот Асцендент поминуваше Сатурн, реализаторот на судбината, кој во нејзиното поле на личноста (прво) остана до 1956 година.

– Меѓутоа, каква навистина беше Грејс Кели?

Харизматичниот Нептун во полето на угледот во нејзината карта и Венера во рафинираната Вага, сместена во близина на Асцендентот, ја скриваа нејзината вистинска личност зад превезот на убавината и харизматичноста. Така Грејс Кели на публиката и делуваше рафинирано, воздржано, гламурозно, кршливо, незаштитено и нежно. Но, ѕвездите тврдат дека е тоа само привид. Сонцето во Шкорпија, Асцендентот и воинствениот Марс повторно во силната и таинствена Шкорпија и сето тоа во полето на личноста (прво), откриваат дека се работи за силна личност, за челична волја и доследност. Истовремено, Меркур, планетата на разумот, во близина на Асцендентот, говори за исклучителна рационалност, пресметливост и таинственост. Можеби токму затоа никогаш не е забележан скандал во нејзиниот приватен живот. Па, дури ниту еден фотограф не успеа да ја “улови” со здолниште подигнато од ветрот. Додека оние кои работеа со неа тврдеа дека таа имаше љубовни врски речиси со сите партнери од филмовите: со Вилијам Холден, Бинг Крозби, Кери Грант, Клерк Гејбл, Гари Купер, Дејвид Нивен, Спенсер Траси. Па дури и со иранскиот шах, Реза Пахлави.

– Тогаш, каде ја трошеше огромната енергија што ја поседуваше, откако престана со снимањето филмови?

Сигурно во градењето на својот лик на принцеза, што го сфати како своја животна улога. Имено, додека таа го снимаше филмот “Држете го крадецот” во Кан и Монако, во 1955 година, стариот лисец, режисерот Алфред Хичкок, го покани принцот Рение Грималди да присуствува на снимањето. А веќе седум месеци подоцна, Грејс го напушти светот на филмот, својот љубовник Олег Касини, ја напушти Америка за да стане принцеза на кнежевството Монако. Ништо чудно ако се знае дека таа ’55 година, магот на илузиите Нептун, во транзит ја допре нејзината натална Венера, планетата на љубовта. Тоа открива дека Грејс Кели не го доживеа принцот Рение реално, на нивната прва средба. Во тој момент во нејзината глава започнаа да се создаваат розови слики за животот како принцеза. Затоа, под дејство на магијата на Нептун, таа во принцот со просечни карактеристики виде нешто посебно. Тогаш на блиските им се довери: “Мислам дека е шармантен. Ги сакам неговите очи. Можам со часови да гледам во нив.”

– Дали бракот со принцот Рение од Монако беше брак од интерес или исполнување на моминските соништа?

Веројатно и едното и другото. И тоа од обете страни. Имено, Месечината, симболот за чувствата и душата, во Риби, говори за длабока романтичност и копнеж кон возвишена љубов. Но, истакнатата позиција на рационалниот Меркур и позицијата на Сатурн во полето на парите, говорат за една реална природа која што знаеше дека животот не е лесен. Па дури беше силно исплашена од сиромаштијата. Веројатно тоа пресуди во одлуката да се омажи за принцот Рение, по само кратко познанство и да ја прекине нејзината сериозна врска со Олег Касини, руски аристократ, стилист и плејбој, кого нејзините родители не го поднесуваа. Меѓутоа, малкумина знаат дека Грејс не отиде во Монако со празни раце. Таа однесе мираз во вредност од два милиони долари, што и ги подари татко и Џек Кели.

– Како се снајде во новата улога?

Денот на свадбата, 19 април 1956 година, навистина беше кралски, како од бајките. Тоа го потврдуваат дури три планети, Месечината, Јупитер и Плутон, што тој ден се наоѓаа во кралскиот Лав, во полето на угледот, во нејзиниот хороскоп. Додека магот на илузиите Нептун, во транзит целосно ја поклопи нејзината натална Венера, придонесувајќи таа целиот настан да го доживее како нестварен. Но, од денот на свадбата, па натаму, детските соништа на Грејс Кели за “принцот на белиот коњ”, започнаа да се распрскуваат како меури од сапуница. Прво, под влијанието на Нептун во нејзиното поле на угледот, таа го смени името во Грација Патриција. Потоа, не беше прифатена од семејството Грималди. Сомневајќи се во чистотијата на нејзиниот холивудски живот и со снобизмот на европската аристократија, тие не можеа како што велеа “да прифатат да живеат под ист покрив со една актерка”.

– Дали беа во право?

Нагласената Шкорпија во нејзината карта зборува за силниот сексапил со кој таа зрачеше и кој не можеше да го сокрие. Венера во полето на тајните (дванаесетто) открива дека таа вешто ги криеше случувањата од својата спална соба. Додека ексцентричниот Уран во полето на љубовта зборува за подготвеност да се експериментира во сексот, за љубовни врски со разни ексцентрици, со мажи кои беа во брак или имаа чудни сексуални фантазии. Значи, воздржаната и студена убавица на филмското платно, во кревет се претвораше во вулкан од страсти. Гари Купер, еден од нејзините партнери на филмот, искуствата со Грејс Кели ги опиша на следниот начин: “Кон мажите е студена како смрзната лигња, се додека не и ги соблечете гаќичките. Тогаш експлодира.” Многу неџентлменски од страната на големиот љубовник. Во секој случај, сето ова говори дека таа имаше несреден, но интензивен љубовен живот. Па, можеби непријатното лично искуство подоцна, во неа го оживеа стравот за љубовниот живот на нејзините деца. Но, во животот се случува токму она од кое најмногу се плашиме.

– Што велат ѕвездите за нејзините деца?

Во полето на децата (петто) се наоѓа Месечината, симболот на емоциите, во знакот Риби. Но, тука е и Уран, планетата на ексцентричноста, кој владее со Водолијата. Тоа зборува дека нејзината прва бременост веројатно заврши со абортус, пред да влезе во брак со Рение. Но, Месечината и Уран во полето на децата откриваат дека нејзините деца ќе бидат ексцентрични и ќе се родат во знаците Водолија и Риби. Од друга страна, мајките Шкорпии најчесто се однесуваат премногу заштитнички кон своите деца. Инаку, принцезите Каролина и Стефани се родени во знакот Водолија, додека принцот Алберт во знакот Риби. Но, ако можеме да им веруваме на преданијата, тие велат дека во 1297 година, Франсоа Грималди, прадедото на принцот Рение, ја освои тврдината Монако преоблечен во свештеник, и на тоа место создаде сврталиште за гусарите и за другите морски разбојници. Па, оттогаш наваму, според преданијата, семејството Грималди го следи проклетството на богот на морињата Нептун, што се манифестира преку несредениот љубовен живот на децата на принцезата Грејс. Сите тие имаат или имаа проблеми да создадат свое семејство, а уште повеќе истото да го одржат. Веројатно тоа проклетство го победи за сега само Каролина, дури во последниов брак.

– Дали Грејс беше задоволна од својата улога на принцеза?

Ѕвездите говорат за силно чувство на должност, па тоа веројатно и помогна до крај да ја игра улогата што се очекуваше од неа. Но, од денот на својата свадба, па натаму, Грејс Кели, повеќе не заигра на филмот. Во 1962 година, таа доби понуда од Алфред Хичкок да игра во неговиот филм “Марни”. Но, Ватикан протестираше, сметајќи дека снимањето филм не е достојна работа за владетелката на една од последните католички монархии. Петнаесет години подоцна, Грејс доби уште една понуда за снимање на филмот “Пресвртница”.

Одбивањето на понудата се обиде да го објасни велејќи: “Позицијата на глумците во Европа сосема се разликува од онаа во Америка. Во Америка, глумците можат да имаат и јавен и приватен живот. А јас, како сопруга на еден принц, имав само еден избор, јавниот живот, животот на принцеза.” Меѓутоа, нејзината нежна душа, гладна за уметност, исполнување бараше во организирањето на културниот живот на Монако. Па, таа ја основаше школата за класичен танц, театарот, правеше изложби на суво цвеќе, организираше вечери на поезијата во Европа и Америка. Дури започна да ја проучува и астрологијата. Но, потајно сонуваше дека еден ден ќе му се врати на филмот. За тоа кажа: “Се уште го чувам несесерот со филмска шминка од времето кога студирав глума. Тој се наоѓа во еден од плакарите на палатата и сигурно е покриен со прав. Можеби еден ден ќе го земам од таму, а можеби не...”

– Каква беше врската со принцот Рение?

Веројатно една длабокоумна Шкорпија не пронајде многу допирни точки со еден променлив и површен Близнак. Меѓутоа, заедничката желба да му го повратат угледот на кнежевството и заедничката љубов кон децата ги држеше во заедница.

А, ѕвездите велат дека можеби измачена од постојаните проблеми во животите на нејзините деца, можеби чувствувајќи празнина во својот живот или чувствувајќи дека го постигнала максимумот и не може да даде ништо повеќе, таа како да си ја предизвика сообраќајната несреќа на 13 септември 1982 година. Тој ден, агресивниот Марс во транзит го допре нејзиниот натален Марс, во полето на личноста. А, Јупитер минуваше преку нејзиниот Асцендент, затворајќи на тој начин едно поглавје од нејзиниот живот и отворајќи ново. Уште повеќе што нејзиниот натален Јупитер, планетата на експанзијата, е сместен во полето на смртта. Тоа открива дека таа веројатно со олеснување го дочекала ослободувањето на душата од телото. Бидејќи смртта не е крај, туку само врата што води до друга форма на постоење.

А, бајката не исчезна ниту по нејзината смрт. Весниците и понатаму пишуваат за неа. Монако стана Мека на светскиот џет-сет. Една роза го доби нејзиното име. Едно време дури и Ватикан размислуваше да ја прогласи за светица. А нејзината приказна е само доказ дека животот е како филмот. А филмот е илузија, бидејќи е ограничен со просторот и времето.

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.