Џакомо Џироламо Казанова
 

Најголемиот до сега познат љубовник и авантурист, Џакомо Казанова, се роди на 2-ри април 1725 година, во Венеција, во семејство на актерите Гаетано Џузепе Казанова и Занета Фаруси. Но подоцна, сакајќи да си даде на значење или кажувајќи ја вистината, Џакомо изјави дека неговиот вистински татко беше венецискиот благородник Микеле Гримани, чие што семејство го поседуваше театарот во кој беа вработени неговите родители. Поради тоа што родителите на Џакомо Казанова беа постојано отсутни, на турнеи со театарот, тој детството го помина со својата баба од мајчина страна, Марција Фаруси. Болежлив по природа, првите години од својот живот тој подоцна ги опиша како “состојба на вегетирање” кое наеднаш, заедно со хроничното крварење од носот исчезнаа како со “рака однесени”, тогаш кога умре неговиот татко, во 1733 година. Ова не е чудно ако се знае дека Сонцето, симболот на егото и таткото, е сместено во полето на здравјето (шесто) во неговиот хороскоп и прави цврста врска со Кирон. Тоа покажува дека малиот Џакомо имаше рането его и истовремено чувствуваше и жал и презир за татка си. Затоа, на несвесен план веројатно се договори со себеси дека тој ќе му ја поврати честа. Така, со смртта на татко му, голем товар падна од неговите мали плеќи. Затоа и веднаш оздраве. А тоа што како возрасен ги изневеруваше жените, можеби беше само потреба, казнувајќи ги нив, да ја казни мајка си за гревот и да се оддолжи во името на неговиот татко.

Сепак таквото чувство на ослободување немаше да се случи, ако не беше помогнато и од ѕвездите. Имено, во 1733 година, транзитниот Сатурн, реализаторот на судбината, го допре неговото натално Сонце, симболот на таткото и егото, во неговото поле на здравјето (шесто), што ги предизвика неговите здравствени проблеми и смртта на татко му. А, потоа, Јупитер, планетата на среќата, транзитираше преку неговиот Асцендент и низ полето на личноста (прво), активирајќи го неговиот натален Уран, симболот за слободата. Додека транзитниот Уран и Кармичкиот Јазол поминаа преку неговата натална Месечина, симболот за душата. Оттаму тој почувствува ослободување и олеснување на душата.

Љубовниот живот на Џакомо Казанова започна многу рано, на 9 годишна возраст. Повторно не случајно, бидејќи во 1734 година Јупитер, страсниот Марс и ексцентричниот Уран во транзит ја активираа неговата натална Месечина, симболот за љубовта. Тоа покажува дека неговото прво сексуално искуство се случи во необични околности, на чуден начин. Дури е можно да се работи за некаква сексуална злоупотреба, поради која тој подоцна имаше сексуални искуства и со мажите и со жените. Како и да е, во мемоарите што Казанова ги напиша пред својата смрт, опиша ни помалку, ни повеќе, туку 116 љубовни авантури. И заклучи дека не се кае за ништо што направи во својот живот. Можеби од денешен аспект на забрзано живеење и засилени комуникации меѓу луѓето ширум светот, тоа не е многу. Но, секако изгледа импозантно за човек кој живееше кон средината на 18-иот век, кога се уште се патуваше со коњи, кочии и бродови.

Тука се наметнува прашањето: Што овој човек го разликува од останатите од неговото време и што е тоа што го направи најпознат љубовник на сите времиња?

Астрологијата, нормално има одговор за тоа. Имено Казанова е роден во знакот на најголемиот освојувач во Зодијакот, во авантуристички настроениот Овен. Подзнакот е во страсната и магнетски привлечна Шкорпија. Додека Месечината се наоѓа во авантуристички расположениот Стрелец. Мажите со Месечина во Стрелец му се спротивставуваат на бракот и најчесто остануваат неженети. Непредвидливиот Уран на Асцендентот го прави интересен и несекојдневен во очите на луѓето. Додека стелиумот во полето на љубовта, коцката и уметноста (петто), меѓу освојувачот Марс, кокетната Венера и брзиот и интелигентен Меркур, го направија постојано еротски надразнет, вистинска “секс-бомба со кус фитил”, шармер и лажго. Ете зошто Казанова не можеше да се смири на едно место. Тој поседуваше вишок енергија која мораше некаде да ја испразни. Тоа објаснува зошто Казанова постојано влегуваше од врска во врска, блефираше, се расфрлаше со еротиката, парадираше, експериментираше во сексот. Но, од друга страна, заради сексуалните скандали често ја губеше позицијата, па дури беше и во затвор повеќе пати. Но, сиот овој огномет од планети во неговата карта открива и нешто друго. Открива дека се работи за исклучително интелигентен и прилагодлив човек.

А, кога во 1742 година Јупитер, заштитникот на високото образование, законот и религијата, транзитираше низ неговото поле на високото образование (деветто) и низ полето на кариерата (десетто), Казанова дипломираше на граѓанско и црковно право. И макар што неколку пати работеше како советник на некои од тогашните бискупи и кардинали, неговата немирна природа која што не трпеше наредби и ограничувања, секогаш го принудуваше да напушта се во потрага по слобода и нов предизвик. Едно време дури работеше и како виолинист во театарот Сан Самуеле, со цел да може да остане независен. Некаде во исто време, во 1746 година, ѕвездите се обидоа да ја подобрат неговата финансиска ситуација. Всушност таа година, Јупитер, планетата на благосостојбата, транзитираше низ неговото поле на парите (второ). Тогаш Казанова се запозна со венецискиот благородник Матео Џовани Брагадин. Всушност му помогна да го преживее срцевиот удар. Па, дури ги плати и сметките за неговиот медицински третман. Откако Брагадин закрепна, во знак на благодарност, го прогласи Казанова за свој посвоен син и богато го награди. Меѓутоа, Брагадин го воведе Казанова и во окултизмот, магијата и кабалата.

Набљудуван од Инквизицијата заради своите окултни познавања, но повеќе заради своите контакти со странските амбасадори, тој беше уапсен во јули 1755 година. Во тоа време, транзитниот Сатурн дојде да ги наплати долговите за неговото однесување во минатото, активирајќи го неговиот натален Сатурн во полето на комуникациите (трето), кој е во нехармоничен однос со неговото натално Сонце, од полето на работата (шесто). Додека Кармичкиот Јазол во транзит го активираше неговиот натален Плутон, симболот за моќта, во полето на пријателите (единаесетто). Тоа открива дека веројатно некој од неговите моќни пријатели му го сврте грбот и го поткажа на Инквизицијата. Сепак, Казанова успеа да побегне од Венеција за Париз, во ноември 1756 година. Во тоа му помогна Нептун, магот на илузиите, кој минуваше низ неговото поле на угледот (десетто). А, Јупитер ја омекна силата на неговите душмани, минувајќи низ полето на таинствените непријатели (дванаесетто). Тоа открива дека Казанова до слободата дојде повторно со добро изведена измама. И наместо неговото бегство од затворот да го направи непожелен во високите кругови на Париз, напротив, неговите разубавени описи за тоа што се беше случило го направија “најбараниот гостин” на забавите што се подготвуваа токму во тие кругови. Додека контактот на неговиот транзитен Уран со наталната Венера, планетата на љубовта, и тоа во полето на љубовта (петто), покажува дека токму во Париз, во 1756 година, Казанова ги изживеа своите најперверзни фантазии. Тогаш, тој ги злоупотреби и своите окултни знаења, со цел да извлече пари од богатите, но фрустрирани жени.

Тука се наметнува едно друго прашање: како му успеваше сето тоа?

Астрологијата вели дека нагласеното поле на љубовта и забавата во неговата карта го направи неодолив, наметлив, еротски привлечен. А, ако тука се надодаде и влијанието на Шкорпијата, тоа го објаснува магнетскиот сјај на неговите очи, опиеноста со мистицизмот и магијата, како и силната енергија која извираше од неговите раце и која го скротуваше женското двоумење.

Во долгиот список на 116-те освоени срца, Казанова ги запиша имињата на многу познати жени од тоа време, на стариот континент. Дури и два пати сакаше да се ожени. Првиот пат за сопранот, кастратот Белино. Вториот пат за Леонилда, за која што подоцна дозна дека е всушност негова вонбрачна ќерка од врската со дона Лукреција.

Како и да е, ќе остане запаметен како човек авантурист, адвокат, дипломат, агент на кралевите и кардиналите, шпиун на владите, ортак на картаџиите, директор на театар, новинар, офицер, заповедник на галија, доушник на државната Инквизиција, манипулатор. Во 1764-65 година, додека Јупитер минуваше низ неговото поле на странство и на кариерата, тој во Русија и напиша ода на царицата Катерина. Дури ја советуваше да направи реформи на календарот, да го смени од Јулијански во Грегоријански, како што направи западна Европа многу порано. Нешто подоцна, во 1787 година, во Прага, тој се дружеше со Моцарт.

Насмеаниот јунак на Рококото, кому никаде не можеа да му “застанат на опашката”, умре на 73 годишна возраст од рак на мочниот меур. Барем така велат неговите биографи. Современата медицина имајќи ја предвид врската меѓу неконтролираниот љубовен живот и болестите на простатата, денес веројатно ќе тврдеше нешто друго. А, астрологијата веројатно ќе потврдеше, имајќи го предвид Асцендентот во Шкорпија и нејзината “Ахилова петица”, репродуктивните органи.

Всушност, Џакомо Казанова го потврди правилото дека од она од кое што живееш, од тоа и ќе умреш.

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.