Селин Дион
 

Благословена со прекрасен глас, кој може да опфати дури 5 октави, што критичарите го оценија како биолошко чудо, таа ги помина сите бариери. Ги помина дури и оние јазичните и за само неколку години стана она што од секогаш сакаше да биде, најсјајната поп-ѕвезда на интернационалното музичко небо.

Селин Дион се роди на 30-ти март 1968 година, во Шарлмањ, Канада, како последно од четиринаесетте деца на Адемар и Терез Дион. А, ѕвездите велат дека родена со знак и Месечина во секогаш расположениот за натпревар и докажување Овен, со подзнак во славољубивиот и театрален Лав, таа е личност која има вродена потреба да е прва и најдобра во она што го работи. Но, таа е и личност со непресушна енергија, кај која што чувството за сопствената вредност и емотивната стабилност растат правопропорционално од славата и статусот што го има во општеството.

И додека нејзините биографи тврдат дека таа во детството била постојано опкружена со љубов и музика, бидејќи се родила во музичко семејство и била најмалото дете во семејството, ѕвездите го тврдат спротивното. Имено цврстата врска меѓу Сонцето, симболот за татко, и рестриктивниот Сатурн, како и Месечината, симболот за мајка, во близок контакт со агресивниот Марс, во моментот на нејзиното раѓање, говорат дека таа беше дете без детство. Мајка и ја имаше доминантната позиција во домот. А, главниот акцент во нејзиното воспитување беше ставан на должностите и материјалните вредности. Затоа, таа веројатно рано согледала дека ќе мора сама да се избори за работите што и значат во животот. Но, за да можеше да ги оствари своите големи амбиции, таа уште од мали нозе мораше да биде исклучително одговорна и дисциплинирана. Тоа се двете најважни особини во нејзиниот карактер.

Во едно свое интервју, Селин Дион вели: “За свои најдобри особини ги сметам мојата одлучност, професионализмот и дисциплината.” Вистински опис во само три збора за суштината на нејзината личност. Тоа го открива и нејзиниот хороскоп. Блискиот контакт меѓу Сонцето, симболот за егото, и рестриктивниот Сатурн во Овен, кој има војнички дух, говори дека Селин Дион е одлучна, дисциплинирана и амбициозна личност. А тоа уште повеќе го потенцира цврстата спрега меѓу Месечината и Марс, во воинствениот Овен, во полето на кариерата (десетто). Притоа, Месечината е симбол за потребите на душата, а освојувачки расположениот Марс е владетел на Овенот. Со други зборови кажано, наталната карта на Селин Дион би можела да биде и карта на воено лице. Она што ја направи пејачка е цврста врската меѓу Венера, планетата на уметноста, и разиграниот Меркур, и тоа во креативните Риби. Тие и дадоа уметнички таленти и смисла за шоу бизнисот. А, “јаготка на шлагот” во развојот на нејзината музичка кариера одиграа нејзиниот Асцендент во гладниот за аплаузи Лав и музикалниот Нептун во полето на креативноста (петто). Што се однесува до приватниот живот, личностите каде што Сонцето и Сатурн се во близок контакт, како што е случајот со Селин Дион, честопати компензација за улогата на таткото во нивниот живот ја бараат во партнерите значително постари од нив.

Во своите пак интервјуа, Селин Дион, со гордост раскажуваше дека нејзиното семејство го помина Квебек (покраината во која што е родена) вдолж и попреку, свирејќи фолк музика. Таа со гордост раскажуваше и за фактот дека нејзините родители подоцна купија еден ресторан и бар, каде што таа започна да пее на 5 години. А, веќе на 12, знаеше точно што сака од својот живот. Па, откако и раскажа на мајка си дека сака да биде професионална пејачка, нејзината мајка го напиша текстот за песната “Тоа беше само сон”, а брат и ја напиша музиката. Откако Селин ја отпеа песната и самата ја сними на лента, тие ја испратија лентата до Рене Анжелил, менаџер од Монтреал. Меѓутоа, тој сигурно никогаш немаше да ја преслуша лентата, ако братот на Селин, Мишел Дион, не му телефонираше потсетувајќи го на тоа. И нормално, Рене ја преслуша лентата и посака да ја види и чуе Селин, во живо. Тогаш, тој им вети на нејзините родители дека ќе направи од неа голема ѕвезда во Канада и Франција. Тој беше толку сигурен во нејзиниот успех, што за издавање на нејзините први два албума подигна кредит, а како залог ја стави сопствената куќа. И не се излажа. Неговата малолетна штитеничка, не само што за кусо време ги врати вложените пари, туку со гласот и песните, незапирливо иташе кон врвовите на славата. За кусо време, Селин стана слушана во целиот свет, почнувајќи од Америка до Јапонија и од Англија до Австралија. Нејзините албуми се продаваа и се продаваат во милионски примероци. Додека за концертите што се одржуваат на големите стадиони се бара билет повеќе.

Тоа го потврдуваат ѕвездите во нејзиниот хороскоп. Јупитер, планетата на среќата, се наоѓа во полето на парите (второ). Сонцето, показателот на самореализацијата и сериозниот Сатурн се издигаат високо на Зенитот, едниот од полето на странство и долгите патувања (деветто), а другиот од полето на угледот и кариерата (десетто). Тука се и Месечината, показателот на медијалноста, со енергичниот Марс. Месечината, на критичен степен на Овен, во полето на кариерата, ја открива нејзината потреба секогаш нешто брзо да направи на тој план, од страв дека нема време. Можеби затоа, на почетокот од својата кариера, на прашањето на новинарите за нејзиниот приватен живот, таа кратко одговори: “Јас сум фокусирана на кариерата, постојано патувам, не размислувам за ништо друго”. И веројатно беше искрена, бидејќи потребата на секој Овен е прво да ги задоволи амбициите и да им покаже на другите колку вреди.

Сепак, пресудна за понатамошниот тек на настаните, беше 1988 година и Евросонгот во Даблин. Селин имаше 20 години, нов имиџ, нова фризура, средени заби. Настапи за Швајцарија, со песната на швајцарските автори Нели Мартинети и Атила Серефтуг, “Не одите без мене”. Победи во една драматична борба само со еден глас повеќе од второпласираната песна. Меѓутоа, таа ноќ во Даблин беше пресвртница и во љубовниот живот на Селин Дион. Таа која што веќе три години беше потајно вљубена во Рене, тогаш за прв пат го бакна и така започна нивната врска која што трае до денешен ден. Тоа се случи кога Сонцето во дирекција, ја сретна Месечината. Додека Јупитер минуваше низ нејзиниот знак и низ полето на угледот и кариерата.

И додека виолините ја свиреа “Бојата на мојата љубов”, песна во која што Селин признава: “Рене, со години во моето срце го чував нашиот сон. Но, тој е сега толку силен што не можам да го задржам во себе. Затоа, дозволи ми да ја обојам вистината, да покажам што чувствувам. Рене, ти си бојата на мојата љубов...” Значи, додека виолините ја свиреа оваа нејзина песна, Селин и Рене го кажаа своето судбинско “да” во аулата на базиликата “Нотр Дам” во стариот дел на Монтреал. Беше тоа во 1994 година и беше тоа најекстравагантната венчавка во дотогашната канадска историја на венчавките, која што чинеше 500.000 американски долари. Но, 1994 беше година кога Јупитер, планетата на среќата, транзитираше низ нејзиното поле на љубовта (петто) и го допре Нептун, планетата на илузиите. А, истото го направија и транзитниот Плутон и Северниот Месечев Јазол, кои се одговорни за кармата и за кармичките врски. Тоа покажува дека Селин навистина ја доживеа својата свадба како нешто нестварно, како бајка, како исполнување на детските соништа.

Нешто подоцна, се исполни и нејзиниот втор голем сон. Таа пееше во париската “Олимпија”.

“По десетгодишно темпо што не би го издржало ниту магаре”, како што напиша еден музички критичар, таа веќе во 1997 година планираше да се повлече, да му се посвети на сопругот и да роди дете. Тогаш се пожали: “Јас веќе не можам да живеам нормален живот како што тоа може да го стори градинарот кој се интересира само за своите домати. Јас не можам да се разбудам наутро и да останам во постела, само затоа што се чувствувам ужасно. ?е бидам пресреќна кога повторно ќе ми биде здодевно.”

Меѓутоа, Судбината сакаше таа да добие понуди да пее во дует со нејзиниот идол, Барбара Стрејсенд, со Лучиано Павароти, да биде пратечки вокал на албумот на Би Џис. Судбината сакаше таа да ја испее и песната лајт-мотив на филмот “Титаник”, “Моето срце ќе продолжи понатаму” и да собере уште неколку награди во 1998 и ’99 година. Кога Јупитер повторно транзитираше низ нејзиниот знак и нејзиното поле на кариерата. Исто така и Сатурн, реализаторот на судбината, транзитираше низ Овен. Но, тој не дава награди однапред, туку дури откако добро ќе ја намачи личноста. А, Сатурн испровоцира навистина стресни ситуации во животот на Селин Дион. Нејзината среќа се замагли, кога кон средината на ’99 година, лекарите констатираа тумор на грлото кај нејзиниот сопруг. Токму во мигот кога Сатурн транзитираше низ нејзината натална Месечина, симболот за љубовта и чувствата, тој и го донесе најголемото емотивно страдање. Целта беше да научи да не ја врзува душата за ништо што е земно, ниту за славата, ниту за парите. Да сака, но да не гради зависнички врски со тие што ги сака.

Во тие драматични мигови од нејзиниот живот Селин Дион ја прекина турнејата, постојано беше до сопругот за време на неговото лекување, се откажа од идејата да стане мајка. И можеби болеста беше само навидум “удар на судбината”, а повеќе нејзина шлаканица, која имаше за цел да ја потсети Селин кои се вистинските вредности во животот. “Рене за мене е многу повеќе од маж и менаџер. Тој е мојот живот, смисла на моето постоење, средиште на светот”, ќе каже тогаш. А, со оглед на карактерот и сериозноста на болеста на Рене, тие одлучија да ја смрзнат неговата сперма и во некои подобри времиња, да се обидат да станат родители. По операцијата и макотрпното лекување, Рене конечно оздраве, во што малкумина веруваа. Тогаш, со цел да му покаже на својот сопруг колку го сака, Селин на 5-ти јануари 2000 година организираше гламурозно обновување на брачниот завет, во Лас Вегас. Церемонијата беше во стилот на “Илјада и една ноќ”. А, бидејќи Анжелил е Сириец, тие беа облечени во сириски народни носии. Потоа, Селин Дион се повлече од сцената за да живее нормален живот, да го минува времето со сопругот, да игра голф и да се обиде да го оствари и својот трет сон, да стане мајка. А раѓањето на нејзиниот син Рене-Чарлс, во јануари 2001 година, по повеќе обиди со вештачко оплодување, е доказ за тоа дека чудата се можни, само ако човек навистина верува во нив.

И макар што Селин со задоволство во гласот им соопшти на новинарите дека нејзината музичка кариера ќе биде во мирување се додека таа ја гради својата кариера на мајка, Судбината повторно сакаше поинаку. Јупитер во 2003 година, транзитираше низ нејзиниот Асцендент и низ првото поле, со што и создаде шанса за позитивни промени и нови почетоци. Па, таа во март 2003 година потпиша еден од најисплатливите договори што некогаш ги потпишал некој пејач. Се обврза дека ќе настапува пет пати неделно, три години, во Цезар Палас, во Лас Вегас, за хонорар од сто милиони долари. Навистина хонорарот беше импресивен, но многумина беа сомничави бидејќи и ризикот беше пропорционален. Заради високата цена на влезницата (90 до 200 долари), скептиците тогаш тврдеа дека проектот ќе биде со краток здив. Меѓутоа, се покажа дека Селин Дион е име што без проблем може да пополни сала од 4.000 места. Таа, само во првите шест месеци во 2005 година оствари повеќе од 43 милиони долари, или 330.000 продадени билети. Тогаш Цезар Палас и го продолжија договорот до крајот на 2006 година. А потоа, заради одличните финансиски резултати, го продолжија договорот до 15-ти декември 2007 година. Хонорарот што таа го доби за овој период беше строго чувана тајна. Упатените тврдеа дека се работи за сума до сега незапаметена во шоу бизнисот. Додека злобниците тврдеа дека Селин беше принудена да го продолжи договорот со цел да ги плати огромните долгови што нејзиниот сопруг, зависник од коцката, ги направи во Цезар Палас. Таа остро го демантираше тоа, тврдејќи дека Рене беше хазардер само еднаш во животот, тогаш “кога се стави на коцка заради нејзината кариера”.

А, како и секој Овен, кој секогаш има потреба да освои уште еден врв и да оди напред, таа не запира. Кон средината на февруари 2008 година, започна светска турнеја, што значи дека би требало да посети 25 држави и да пее во 100 градови, промовирајќи го новиот албум, “Taking chances”.

Шоуто мора да продолжи, нели?

 

 
 
Регистрирано во Македонска Авторска Агенција
под реден број 970 Скопје
 
Ниту еден дел од овој текст не смее да биде препечатуван, копиран или објавуван во било која форма или на било кој начин во електронските или печатените медиуми, без писмена согласност од авторот.
Недозволеното репродуцирање се казнува со закон.